ဇွန် ၂၊ ၂၀၁၆
M-Media
– အာဖဂန်နစ္စတန်မှာ စစ်ဘေးစစ်ဒဏ်တွေကြောင့် နိုင်ငံအတွင်း အိုးအိမ်စွန့်ခွာ ရွှေ့ပြောင်းနေထိုင်ရသူ အရေအတွက်ဟာ ၂၀၁၂ ခုနှစ်နောက်ပိုင်း ၂ ဆ တိုးလာခဲ့ပြီး ၁.၂ သန်းအထိ ရှိလာခဲ့တယ်လို့ နိုင်ငံတကာ လူ့အခွင့်အရေးအဖွဲ့တစ်ခုဖြစ်တဲ့ Amnesty International က ပြောကြားလိုက်ပြီး အဲဒီဒုက္ခသည်တွေကို အစိုးရကိုယ်တိုင်က လျစ်လျူရှုထားတဲ့အပြင် နိုင်ငံတကာက စိတ်ဝင်စားမှုလည်း ကင်းမဲ့နေတယ်လို့ ဆိုပါတယ်။
My children will die this winter: Afghanistan’s broken promise to the displaced ဆိုတဲ့ ခေါင်းစဉ်နဲ့ ထုတ်ပြန်တဲ့ အစီရင်ခံစာမှာ ဒီလိုဖော်ပြလိုက်တာဖြစ်ပြီး အခြေခံဝန်ဆောင်မှုတွေ မပေးနိုင်မှုကြောင့် သူတို့တွေဟာ အိုးအိမ်စွန့်ခွာ ထွက်ပြေးခဲ့ရတာဖြစ်ပြီး အသက်ရှင်ရပ်တည်ရေး အာမ, မခံနိုင်တဲ့ အခြေအနေမျိုး ဖြစ်နေတယ်လို့လည်း ဆိုပါတယ်။
“အာဖဂန်နစ္စတန်ကို နိုင်ငံတကာက လှည့်မကြည့်တော့တဲ့နောက်ပိုင်း ပဋိပက္ခတွေရဲ့နောက်ကွယ်မှာ ကျန်နေတဲ့သူတွေရဲ့ အခက်အခဲတွေကို မေ့လျော့နေမှုဟာ စိုးရိမ်ရတဲ့အခြေအနေ ရောက်နေပါပြီ” လို့ Amnesty International အဖွဲ့ရဲ့ တောင်အာရှဒါရိုက်တာတစ်ဦးဖြစ်သူ ချမ်ပါ ပတေးလ်က ပြောကြားခဲ့ပါတယ်။
“ကိုယ့်အိမ်ကနေ ဘေးကင်းရာကို ထွက်ပြေးပုန်းရှောင်ပြီးတဲ့နောက်မှာတောင် ကိုယ့်တိုင်းပြည်ထဲမှာတင် အင်မတန်ဆိုးရွားတဲ့အခြေအနေတွေနဲ့ ကြောင့်ကြနေရတဲ့ အာဖဂန်ပြည်သူတွေရဲ့ အရေအတွက်ဟာ တဖြည်းဖြည်းများပြားလာပြီး ကမ်းမမြင်လမ်းမမြင်ဘ၀နဲ့ အသက်ရှင်နိုင်ဖို့အရေး ရုန်းကန်နေရပါတယ်”
အစီရင်ခံစာ အဆုံးပိုင်းမှာတော့ နိုင်ငံအတွင်းက စစ်ဘေးရှောင်တွေရဲ့ အကြပ်အတည်းတွေကို သိပ်မနောက်ကျသွားခင်မှာ အဆုံးသတ်ပေးဖို့ အာဖဂန်နစ္စတန်နဲ့ ကမ္ဘာကြီးက အခုချက်ချင်း ဆောင်ရွက်ပေးရမယ်လို့ တိုက်တွန်းပြောကြားခဲ့ပါတယ်။
Ref: Channel News Asia
