Tag: fifa

အောက်တိုဘာ ၂၇၊ ၂၀၁၅
M-Media

– လာမည့်နှစ်ဆန်းပိုင်းတွင် ပြုလုပ်မည့် ဖီဖာဥက္ကဌ ရွေးချယ်ပွဲတွင် ၀င်ရောက်ယှဉ်ပြိုင်ရန် စီစဉ်ထားခြင်းမှ နှုတ်ထွက်လိုက်ပြီဟု ဘရာဇီး ဂန္တ၀င်ဘောလုံးသမား ဇီကိုက ပြောကြားလိုက်သည်။

မိမိသာ ဖီဖာဥက္ကဌဖြစ်ပါက အဖွဲ့အား ဒီမိုကရေစီနည်းကျစွာနှင့် ပွင့်လင်းမြင်သာစွာ ဆောင်ရွက်သွားမည်ဟု ဇစ်ကိုက ပြီးခဲ့သည့်လက ကြေငြာစာတမ်းတစ်ခု ထုတ်ပြန်ခဲ့သေးသည်။ ၀င်ရောက်ရွေးချယ်မည့် ကိုယ်စားလှယ်လောင်းအဖြစ် စာရင်းတင်သွင်းရန် နောက်ဆုံးရက်ကို လာမည့် တနင်္လာနေ့တွင် သတ်မှတ်ထားပြီး ဇစ်ကိုမှာ ဘရာဇီးလ်ဘောလုံးအဖွဲ့ချုပ်အပါအ၀င် ဘောလုံးအဖွဲ့ချုပ်နှစ်ခု၏ ထောက်ခံမှုသာ ရရှိခဲ့သည်။

ဖီဖာဥက္ကဌအဖြစ် ၀င်ရောက်ယှဉ်ပြိုင်မည့် ကိုယ်စားလှယ်လောင်းမှာ ဘောလုံးအဖွဲ့ချုပ် ၅ ခု၏ ထောက်ခံမှုရရှိရန် လိုအပ်သည်။ ဇီကိုမှာ စောစောပိုင်းက ယူအီးအက်ဖ်အေ၏ ထောက်ခံမှုကို ရရှိမည်ဟု ရေပန်းစားခဲ့သော်လည်း ယူအီးအက်ဖ်အေက ဂီယန်နီ အင်ဖန်တီနိုအား ထောက်ခံခဲ့သည်။

“ထောက်ခံမယ်ဆိုတဲ့ စာ ၆ စောင်ကို ရရှိခဲ့တဲ့အတွက် ကျွန်တော်စောစောပိုင်းက စိတ်လှုပ်ရှားခဲ့ပါတယ်။ ဒါပေမယ့် ဒီနေ့မှာ ပလာတီနီထွက်သွားပြီးနောက် ယူအီးအက်ဖ်အေရဲ့ ဆောင်ရွက်မှုက အခြေအနေအားလုံးကို လုံးဝပြောင်းလဲစေခဲ့ပါတယ်” ဟု ဇီကိုက ၎င်း၏ Facebook စာမျက်နှာတွင် ရေးသားခဲ့သည်။

Ref: Goal

အောက်တိုဘာ ၁၇၊ ၂၀၁၅
M-Media

– ၂၀၀၆ခုနှစ် ကမ္ဘာဖလား ကျင်းပခွင့်ရရေးအတွက် ဂျာမနီနိုင်ငံမှာ ဖီဖာအမှုဆောင်ကောင်စီ အဖွဲ့ဝင်များသို့ လာဘ်ထိုးခဲ့သည်ဟု ဂျာမန် အပတ်စဉ် သတင်းစာ Der Spiegel က ယမန်နေ့တွင် ဖော်ပြလိုက်သည်။

အိမ်ရှင်ရွေးချယ်ရေး ကော်မတီသို့ ဆွဇ်ဖရန့် ၁၀.၃ သန်း (ထိုစဉ်က ကန်ဒေါ်လာ ၆ သန်း) ပေးအပ်ခဲ့ခြင်းဖြစ်ပြီး ထိုကိစ္စအား Adidas အကြီးအကဲ ရောဘတ် လူးဝစ် ဒရိုင်ဖက်စ်က ၎င်း၏ ကိုယ်ပိုင်ငွေကြေးမှ ကူညီခဲ့သည်ဟု ဆိုသည်။ ဖီဖာကမူ ထိုသတင်းအတွက် စုံစမ်းစစ်ဆေးမှုများ ပြုလုပ်သွားမည်ဟု ပြောကြားခဲ့သည်။

အဆိုပါ လာဘ်ငွေမှာ ၂၀၀၀ ခုနှစ် ဇူလိုင် ၆ ရက်နေ့တွင် ဂျာမနီက ကမ္ဘာ့ဖလားကျင်းပခွင့် ရရှိမှု မတိုင်မီ ဖီဖာ၏ အဖွဲ့ဝင် ၂၄ ဦးပါသော အမှုဆောင်ကော်မတီမှ အာရှကိုယ်စားလှယ် ၄ ဦး၏ မဲများကို သေချာစေရန် အသုံးပြုခဲ့သည်ဟု ဆိုသည်။

“ဒါဟာ ၁၉၇၀ ပြည့်နှစ်တွေအတွင်း ဘွန်ဒစ်လီဂါ လာဘ်ပေးလာဘ်ယူပြဿနာ ဖြစ်ပြီးကတည်းက ဂျမနီဘောလုံးလောကအတွက် အကြီးမားဆုံး ပြဿနာအဖြစ် ပေါ်ထွက်လာနိုင်ပါတယ်။ ဂျာမနီက ၂၀၀၆ ကမ္ဘာဖလား ကျင်းပခွင့်ရခဲ့ခြင်းဟာ လာဘ်ငွေတွေနဲ့ ၀ယ်ယူလိုက်တဲ့ပုံစံမျိုးဖြစ်ဖို့ အလားအလာရှိတယ်လို့ Spiegel က သိရပါတယ်” ဟု အဆိုပါမဂ္ဂဇင်းတွင် ဖော်ပြထားသည်။

အာရှကိုယ်စားလှယ်များ

ဂျာမနီအား အိမ်ရှင်အဖြစ် ရွေးချယ်ရေး မဲခွဲရာတွင် နယူးဇီလန်မှ ချားလ်စ် ဒမ့်ပ်ဆေးက ကြားနေခဲ့ပြီးနောက် ၁၂- ၁၁ မဲဖြင့် အနိုင်ရခဲ့ခြင်းဖြစ်ပြီး အာရှကိုယ်စားလှယ်များက ဥရောပကိုယ်စားလှယ်များကဲ့သို့ပင် ဂျာမနီအတွက် မဲပေးခဲ့ကြသည်။

ထိုအထဲမှ အာရှကိုယ်စားလှယ် ၃ ဦးမှာ သက်ရှိထင်ရှား ရှိနေပြီး Spiegel မဂ္ဂဇင်းက တောင်ကိုရီးယားမှ ချွန်မွန်ဂျွန်းကို ထိုကိစ္စနှင့်ပတ်သက်၍ ဆက်သွယ်မေးမြန်းခဲ့ရာ ဖြေဆိုရင် မထိုက်တန်ဟု ပြောကြားခဲ့သည်။

အိမ်ရှင်အဖြစ်ရရှိရေး ကြိုးစားမှုကော်မတီကို ဦးဆောင်ခဲ့သည့် ဂျာမနီဂန္တ၀င်ကစားသမား ဖရန့်ဇ် ဘက်ကင်ဘောင်ဝါ၊ ဂျာမနီဘောလုံးအဖွဲ့ချုပ် DFB ၏ လက်ရှိဥက္ကဌ ၀ုလ်ဖ်ဂန် နီယာစ့်ဘက်ခ်ျနှင့် အခြားသော ဘောလုံးထိပ်တန်းအရာရှိများမှာ ထိုလာဘ်ပေးမှုကို ၂၀၀၅ ခုနှစ်မတိုင်ခင် သိရှိခဲ့သည်ဟု ထိုမဂ္ဂဇင်းက ထည့်သွင်းဖော်ပြခဲ့သည်။

လူးဝစ်-ဒရိုက်ဖက်စ်၏ အရစ်ကျပေးချေမှုကို လျှို့ဝှက်ထားခဲ့ပြီး အိမ်ရှင်ဖြစ်ရေး ကြိုးပမ်းမှုကော်မတီ၏ ဘက်ဂျက်မှ သွားသည်မဟုတ်ဘဲ၊ ကမ္ဘာ့ဖလား ပြိုင်ပွဲကျင်းပရေးကော်မတီ၏ ဘက်ဂျက်မှလည်း ကျခံခြင်းမဟုတ်ပေ။

Ref: Aljazeera

အောက်တိုဘာ ၁၆၊ ၂၀၁၅
M-Media

– ယူအီးအက်ဖ်အေဥက္ကဌ ပလာတီနီအား ကမ္ဘာ့ဖလားဥက္ကဌအဖြစ် ၀င်ရောက်အရွေးခံရန် မိမိတို့၏ ထောက်ခံမှုကို ဆိုင်းငံ့ထားလိုက်ပြီး ၎င်းရင်ဆိုင်နေရသည့် ငွေကြေးအရှုပ်အရှင်းများအတွက် စုံစမ်းစစ်ဆေးမှု ရလဒ်များကို စောင့်ကြည့်သွားမည်ဟု အင်္ဂလန်ဘောလုံးအဖွဲ့ချုပ် FA က ယနေ့တွင် ကြေငြာလိုက်သည်။

လက်ရှိဥက္ကဌ ဆပ်ဘလတ္တာ ရာထူးမှ နှုတ်ထွက်တော့မည်ဟု ကြေငြာပြီးနောက်ပိုင်း လာမည့်နှစ်ဆန်းပိုင်းတွင် ပြုလုပ်မည့် ဖီဖာဥက္ကဌ ရွေးကောက်ပွဲတွင် ပလာတီနီမှာ အရွေးခံရရန် ရေပန်းစားနေသူဖြစ်သည်။ သို့သော်လည်း ဆပ်ဘလတ္တာနှင့် ဆက်စပ်၍ ၎င်းမှာ ငွေကြေးအရှုပ်အရှင်းများနှင့် ရင်ဆိုင်နေရပြီး ပြီးခဲ့သည့်သီတင်းပတ်တွင် ဖီဖာကလည်း ၎င်းတို့နှစ်ဦးအား ရက်ပေါင်း ၉၀ တာဝန်မှ
ရပ်စဲလိုက်သည်။

“မိုက်ကယ်ပလာတီနီရဲ့ ကျင့်ဝတ်ပြဿနာနဲ့ ပတ်သက်ပြီး အောက်တိုဘာ ၁၅ ရက်နေ့မှာ ယူအီးအက်ဖ်အေက ကြေငြာချက်ထုတ်တာကို FA က ထောက်ခံပါတယ်။.. မစ္စတာ ပလာတီနီဟာ ဒီစွဲချက်တွေကို ရင်ဆိုင်ရာမှာ အောင်မြင်မှုရပြီး သူ့ရဲ့ဂုဏ်သိက္ခာကို ပြန်ဆယ်နိုင်ပါစေလို့လည်း FA က ဆန္ဒပြုပါတယ်။ ပြီးတော့ ဒီလုပ်ငန်းစဉ်ကို ပျက်ဆီးစေမယ့် ဆောင်ရွက်မှုမျိုးကိုလည်း ကျွန်တော်တို့ စိတ်မ၀င်စားပါဘူး” ဟု FA က ထုတ်ပြန်သော ကြေငြာချက်တွင် ဖော်ပြထားသည်။

ထို့ပြင် မိမိတို့အနေဖြင့် ထိုပြဿနာနှင့်ပတ်သက်သည့် အခြားအချက်အလက်များကိုလည်း ထပ်မံသိရှိခဲ့ပြီး၊ တရားရေးဆိုင်ရာများ ပြေလည်သွားကာ ပလာတီနီ၏ အခြေအနေ ရှင်းလင်းသွားသည်အထိ ၎င်းအား ဖီဖာဥက္ကဌလောင်းအဖြစ် ထောက်ခံမှုကို ရပ်ဆိုင်းသွားမည်ဟု ယနေ့မနက်တွင် ဆုံးဖြတ်ခဲ့ကြောင်း ထည့်သွင်းပြောကြားခဲ့သည်။

Ref: Goal

အောက်တိုဘာ ၁၁၊ ၂၀၁၅
M-Media

– ဖီဖာကျင့်ဝတ်ကော်မတီမှ ရရှိခဲ့သည့် ဘဏ္ဍာရေးဆိုင်ရာ အရှုပ်အထွေး အထောက်အထားအသစ်များအရ ဖီဖာဥက္ကဌ ဘလတ္တာနှင့် ယူအီးအက်ဖ်အေ ဥက္ကဌ ပလာတီနီတို့မှာ ဘောလုံးလောကမှ နှစ်ပေါင်းများစွာ အနားယူရနိုင်သည်ဟု ဖီဖာ၏ အကြီးတန်း တာဝန်ရှိသူတစ်ဦးက The Mail သတင်းဌာနသို့ ယနေ့တွင် ပြောကြားခဲ့သည်။

“အခုအချိန်မှာ ဇာတ်ရှိန်က မြင့်နေပြီး လူတွေ ထင်ထားတာထက်ကို ပိုပြီး ဆိုးရွားပါတယ်။ တကယ်တမ်း ဒီကိစ္စဟာ ပုံပျက်ပန်းပျက်တာထက်ကို ကျော်ပြီး ရာဇ၀တ်မှုဆိုင်ရာ ကိစ္စ ဖြစ်သွားနိုင်ပါတယ်” ဟု ကျင့်ဝတ်ကော်မတီနှင့် နီးစပ်သည့် အဆိုပါတာဝန်ရှိသူက ပြောကြားခဲ့သည်။

ပလာတီနီနှင့် ဘလတ္တာတို့မှာ လက်ရှိအချိန်တွင် ငွေကြေးကိစ္စနှင့် ပတ်သက်၍ ရက်ပေါင်း ၉၀ ရာထူးမှ အနားပေးခြင်းခံထားရပြီး နှစ်ဦးစလုံးက ၎င်းတို့မှာ အပြစ်မရှိဟု ငြင်းဆိုထားကြသည်။ ချစားမှုပြဿနာများနှင် ရင်ဆိုင်နေရသည့် ဖီဖာမှာ လာမည့် ဖေဖော်ဝါရီတွင် ဥက္ကရွေးချယ်ပွဲရှိနေပြီး ယခုပြဿနာကြောင့် ထိုရွှေးကောက်ပွဲမှာလည်း မရေရာဖြစ်နေသည်။

Ref: Dailymail

အောက်တိုဘာ ၈၊ ၂၀၁၅
M-Media

– ကမ္ဘာ့ဘောလုံးအဖွဲ့ချုပ် ဖီဖာဥက္ကဌ ဆပ်ဘလတ္တာနှင့် ဥရောပဘောလုံးအဖွဲ့ချုပ် ယူအီးအက်ဖ်အေဥက္ကဌ မိုက်ကယ်ပလာတီနီတို့မှာ လတ်တလော ရက်ပေါင်း ၉၀ ရာထူးမှ အနားပေးခြင်း ခံခဲ့ရသည်ဟု သိရသည်။

ဖီဖာ၏ ကျင့်ဝတ်ကော်မတီက ယမန်နေ့တွင် ထိုကဲ့သို့ အနားပေးခြင်းဖြစ်ပြီး၊ ၉ နှစ်အရင်က ဘလတ္တာအား အကြံဥာဏ် ပေးခဲ့သည့်အတွက် ၂၀၁၁ ခုနှစ်တွင် ပလာတီနီက ကန်ဒေါ်လာ ၁.၃၅ သန်း ရရှိခဲ့မှုနှင့် ပတ်သက်၍ စုံစမ်းစစ်ဆေးမှုများ ပြုလုပ်နေသည်ဟု သတင်းများ ထွက်ပေါ်ပြီးနောက်ပိုင်း ယခုအရေးယူမှု ပေါ်ထွက်လာခြင်း ဖြစ်သည်။

ဘလတ္တာမှာ ကမ္ဘာ့ဖလား ရုပ်သံလွှင့်ခွင့်ကို ၎င်း၏ လုပ်ဖော်ကိုင်ဖက်ဖြစ်သူ ဂျက်ဝါနာအား အောက်ဈေးဖြင့် ရောင်းချမှုနှင့်ပတ်သက်၍လည်း စုံစမ်းစစ်ဆေးမှုများကို ခံနေရသည်။ အဆိုပါ ရုပ်သံလွှင့်ခွင့်များအတွက် ဂျက်ဝါနာမှာ ပေါင် ၁၁ သန်း အကျိုးအမြတ်ရခဲ့သည်။

ကျင့်ဝတ်ကော်မတီ၏ ထိုဆုံးဖြတ်ချက်ကို ဖီဖာ၏ တရားရေးဌာနက အတည်ပြုရန် လိုအပ်နေပြီး ယခုသီတင်းပတ်အဆုံးတွင် ဆောင်ရွက်သွားရန် ရှိနေသည်။ အတည်ပြုပြီးပါက ဘလတ္တာနှင့် ပလာတီနီတို့မှာ ဇန်န၀ါရီလဆန်းပိုင်းအထိ ရာထူးမှ အနားယူရမည်ဖြစ်သည်။

ထိုသို့အရေးယူခံရခြင်းက ဘလတ္တာ၏ ဖီဖာအား ၁၇ နှစ်ကြာ ဦးဆောင်ခဲ့မှုနှင့် လာမည့်နှစ်ဆန်းတွင် ပြုလုပ်မည့် ဖီဖာဥက္ကဌ ရွေးကောက်ပွဲတွင် ၀င်ရောင်ယှဉ်ပြိုင်ရန် လျာထားသည့် ပလာတီနီ၏ ယူအီးအက်ဖ်အေ ဥက္ကဌအဖြစ် ၈ နှစ်ကြာ ဆောင်ရွက်မှုကို အဆုံးသတ်သွားမည့် အလားအလာလည်း ရှိနေသည်။

Ref: Dailymail