နမ့်ဆန်မြို့ မီဘေးသင့်သူများသို့ မန္တလေးမှ မွတ်စလင်များ သိန်း ၇၀၀ ကျော် လှူဒါန်း

ဖေဖော်ဝါရီ ၁၆၊ ၂၀၁၆
M-Media
သတင်း-အောင်သူရ
.
– ရှမ်းပြည်နယ်မြောက်ပိုင်း နမ့်ဆန်မြို့ရှိ မီးဘေးသင့်ပြည်သူများ အတွက် မန္တလေးမြို့ “အစ္စလာမ်ဘာသာ လူမှုရေးအဖွဲ့ မှ” ကျပ်သိန်း ၇၁၀ ကျော် လှူဒါန်းခဲ့သည်ဟု သိရသည်။
.
ဖေဖော်ဝါရီ ၁၆ ရက်နေ့ (ယနေ့)တွင် သွားရောက်လှူဒါန်းခဲ့ခြင်းဖြစ်ပြီး မီးဘေးသင့်ပြည်သူများ ပညာရေးအတွက် သိန်း ၃၀၊ ကျန်းမာရေး အတွက် သိန်း ၃၀၊ တစ်အိမ်ထောင်လျှင် ၂၂၅,၀၀၀ ကျပ်စီဖြင့် ငွေကျပ် (၆၅,၉၂၅,၀၀၀) စုစုပေါင်း လှူဒါန်းငွေ တန်ဖိုး ကျပ် (၇၁,၉၂၅,၀၀၀) ရှိခဲ့သည်။
.
ထို့ပြင် ငွေကျပ် သုံးသိန်း တန်ဖိုးရှိ ဆေးဖာ ၃ ဖာကိုလည်း မီးဘေးသင့်ပြည်သူများသို့ ပေးအပ်ခဲ့သည်။ မန္တလေးမြို့ အစ္စလာမ်ဘာသာ လူမှုရေးအဖွဲ့က ထိုကဲ့သို့ လှူဒါန်းနိုင်ရန် အတွက် ဗလီဝတ်ကျောင်းတော်များ၊ မွတ်စလင်အဖွဲ့အစည်းများက အလှူငွေ ကောက်ခံပေးခဲ့ခြင်းဖြစ်သည်။

.
“လူသားချင်းစာနာမှုပေါ့နော်။ ဟိုမှာ ဒုက္ခအကြီးအကျယ်ရောက်နေတယ်။ ကျွန်တော်တို့ဘက်က ရောက်သွားနိုင်တယ်။ သူ့တို့လက်ထဲကိုလည်း တကယ် ထိထိရောက်ရှိမယ့် ပမာဏ ထည့်ပေးခဲ့တယ်။ အားလုံး အဆင်ပြေအောင် လုပ်ပေးနိုင်ခဲ့တယ်။ အဲဒီအတွက် ဖြစ်ရတဲ့ ပီတိကို ဘယ်လိုမှ ဖော်ပြလို့မရပါဘူး” ဟု အစ္စလာမ်ဘာသာ လူမှုရေးအဖွဲ့မှ တာဝန်ရှိသူတစ်ဦးဖြစ်သူ ဟာဂျီ ကိုစိန်လင်းက M-Media သို့ ပြောကြားခဲ့သည်။
.
ထို့ပြင် နမ့်ဆန် မီးဘေးသင့်ပြည်သူများ ပြန်လည်ထူထောင်ရေး လုပ်ငန်းအတွက်လည်း ထပ်မံ လှူဒါန်းရန် အစီအစဉ် ရှိနေသေးသည်ဟု ၎င်းက ထည့်သွင်းပြောကြားခဲ့သည်။
.
မန္တလေးရှိ မွတ်စလင်အဖွဲ့အစည်းများ၊ ဗလီဝတ်ကျောင်းတော်များ ပူးပေါင်းဖွဲ့စည်းထားသည့် အဆိုပါ “အစ္စလာမ်ဘာသာ လူမှုရေးအဖွဲ့” မှာ ၂၀၀၈ ခုနှစ် နာဂစ်မုန်တိုင်း တိုက်ခိုက်ပြီးကတည်းက လူမျိုးဘာသာ မခွဲခြားဘဲ လူမှုကူညီရေးလုပ်ငန်းများကို လုပ်ဆောင်နေသည့် အဖွဲ့ဖြစ်သည်။